एमसीसीबारे वाम बुद्धिजीवीहरुको वक्तव्य सार्वजनिक
१४ भदाै, काठमाडाैं । सुरुदेखि नै एमसीसी सम्झौताको विरोध गरिरहेका वाम बुद्धिजीवीहरुले नेपालको सार्वभौम संसदले पारित गरेको व्याख्यात्मक घोषणालाई समेटेर एमसीसी सम्झौता संशोधन गर्न आह्वान गर्दै बुधवार एक वक्तव्य सार्वजनिक गरेका छन् । बुधवार अर्थमन्त्री प्रकाशशरण महत र एमसीसीका उपाध्यक्ष क्यामरन एल्फर्डबिच औपचारिक रुपमा नयाँ चरण सुरु भएको सम्झौतापत्र आदानप्रदान भएको थियो ।
अमेरिकी सरकार वा एमसीसी नियोगले व्याख्यात्मक घोषणालाई औपचारिक र लिखित रुपले अनुमोदन नगरेसम्म यो एकतर्फी व्याख्याको कुनै कानुनी हैसियत हुदैन भनेर त्यतिबेला आफूहरुले गरेको विरोधलाई स्मरण गर्दै वक्तव्यमा भनिएको छ,” नेपाल सरकारले यसबारे पठाएको आधिकारिक पत्रको जवाफमा अमेरिकी सरकारले कुनै आधिकारिक पत्र पठाएको जानकारी सर्वसाधारणमा छैन ।” व्याख्यात्मक घोषणामा एउटा कुरा रहनु र एमसीसी कम्प्याक्टमा त्यसको ठिक विपरित कुरा रहनु विरोधाभाषपूर्ण मात्र नभई एमसीसीलाई यथावत रुपमा नै लागु गर्ने चालबाजी भएको र एमसीसी सम्झौताका सम्बद्ध दफाहरुलाई नेपालको राष्ट्रियहितमा हुनेगरी संशोधन गरेपछि मात्र सम्झौता लागु हुने (Entry into Force) चरणमा जान उचित हुने वक्तव्यमा उल्लेख छ ।
अमेरिकी सरकारका प्रतिनिधिहरुले एमसीसी नेपाललाई चाहिँदैन भने अस्वीकार गरे हुन्छ भनेर सार्वजनिक रूपमा हाँक दिइरहेका बेला नेपालले अस्वीकार गर्न नसकी व्याख्यात्मक टिप्पणीको मुखौटा देखाएर चोरबाटोको सहारा लिनु नेपालको सार्वभौम संसदलाई निरिह बनाउने काम भएको र लम्परसारवाद कै अभिव्यक्ति भएको बुद्धिजीवीहरुको निष्कर्ष रहेको छ । अमेरिकी दूतावासबाट “व्याख्यात्मक घोषणा” बारे सहमति भएको अस्पुष्ट समाचार यदि सहि हो र नेपाल सरकारले अमेरिकी सरकारको पत्र प्राप्त गरेको हो भने अविलम्ब एमसीसी सम्झौताका दफाहरु व्याख्यात्मक घोषणा अनुरुप संशोधन गरिनको लागि सम्मानित संसद र सरकारको वक्तव्य मार्फत ध्यानाकर्षण गराइएको छ ।
वक्तव्यमा पीताम्बर शर्मा, श्याम श्रेष्ठ, निनु चापागाईं, दिपेन्द्रबहादुर क्षेत्री, महेश मास्के, रत्नसंसार श्रेष्ठ, मीना पौडेल, युवराज संग्रौला, रामराज रेग्मी, खगेन्द्र प्रसाईं, शरद वन्त, गंगा कसजु, विन्दु शर्मा, सारा देवकोटा र प्रदिप बम्जनको हस्ताक्षर रहेको छ ।
(वक्तव्यकाे पूर्णपाठ)
जवाफ लेख्नुहोस्